namitha, కవల పిల్లలకు జన్మనిచ్చిన నటి నమిత – actress namitha blessed with twin baby boys in chennai

అందాల తార నమిత (Namitha) కవల పిల్లలకు (twins) జన్మనిచ్చారు. ఇన్‌స్టాగ్రామ్‌ వేదికగా ఆమే స్వయంగా ఈ విషయాన్ని వెల్లడించారు. శ్రీకృష్ణ జన్మాష్టమి సందర్భంగా అభిమానులకు శుభవార్త చెబుతున్నామంటూ.. కవల పిల్లలతో ఉన్న దృశ్యాలను విడుదల చేశారు. ఇద్దరూ మగపిల్లలేనని, ఆరోగ్యంగా ఉన్నారని తెలిపారు. కృష్ణాష్టమి పర్వదినాన్ని పురస్కరించుకొని తన భర్తతో కలిసి ఆ కవలలిద్దరినీ తీసుకొని ఆలయానికి వెళ్లి ఆశీస్సులు తీసుకున్నారు నమిత. ఆలయ ప్రాంగణంలోనే వీడియోను చిత్రీకరించి సోషల్ మీడియా ద్వారా షేర్ చేశారు.

చెన్నై నగరంలోని ఓ ప్రైవేట్ ఆస్పత్రిలో ఇద్దరు మగ శిశువులకు నమిత జన్మనిచ్చారు. ఆసుపత్రి యాజమాన్యానికి, గర్భం దాల్చిన నాటి నుంచి వైద్య చికిత్స, సలహాలు, సూచనలు అందించిన డాక్టర్లు భువనేశ్వరి, ఈశ్వర్, వెల్లు మురుగన్, డాక్టర్ నరేశ్‌కు ఆమె కృతజ్ఞతలు తెలిపారు. ఇక ముందు కూడా అభిమానుల ఆశీస్సులు తమకు ఉండాలని ఆమె కోరారు.

సొంతం సినిమా ద్వారా తెలుగు ప్రేక్షకులకు పరిచయమైన నమిత.. తన అందంతో అభిమానులను కట్టిపడేశారు. జెమిని, సింహా తదితర సినిమాల్లో నటనతో ప్రత్యేక గుర్తింపు సాధించారు. తెలుగుతో పాటు తమిళ, కన్నడ చిత్రాల్లోనూ నటించారు. మల్లిరెడ్డి వీరేంద్ర చౌదరిని నమిత వివాహం చేసుకున్నారు. గతేడాది నవంబర్‌లో నాలుగో వివాహ వార్షికోత్సవం జరుపుకొన్నారు.